Anonyme [1652], OVIDE PARLANT A TIESTE, Luy monstrant l’ordre qu’il doit tenir pour gouuerner vn Estat, & le rendre victorieux malgré ses Ennemis. I. Que la Coustume doit estre obseruée, sans que l’on y puisse mettre empeschement. II. Que les Loix receuës, ne se doiuent aucunement changer. III. Que l’Espée roüillée de Iustice, peut perdre le Mazarin par ses nouuelles Loix. IV. Que les Loix permettent d’appeler mains ennemies pour esuiter vne continuelle guerre. V. Que les Vertus modernes, ce doiuent loüer autant que les anciennes. VI. Que son Altesse Royalle, Messieurs les Princes, & le Parlement, sont obligez de retirer le Roy d’entre les mains du Mazarin. , français, latinRéférence RIM : M0_2637. Cote locale : B_18_37.
page précédent(e)

page suivant(e)

-- 32 --

y est conuié, ne peut honnestement s’y tenir comme
spectateur, de peur qu’on ne luy attribuë, que
ce soit faute ou d’affection, ou de cœur. Outre l’iniustice
d’vne telle action & vilaine, d’engager à
la protection de vostre honneur, autre valeur & force
que la vostre, ie trouue du des-aduantage à vn
homme de bien, & qui pleinement se fie de soy,
d’aller mesler sa fortune, à celle d’vn second : chacun
court assez hazard pour soy sans le courir encore
pour vn autre, a assez à faire à s’asseurer en sa propre
vertu, pour la deffense de sa vie, sans commettre
chose si chere en mains tierces. Car s’il n’a esté expressement
marchandé au contraire, c’est vne partie
liée. Si vostre second est à terre, vous en auez deux
sur les bras, auec raison. Et de dire que c’est supercherie,
elle l’est voirement : comme de charger bien
armée, vn homme qui n’a qu’vn tronçon d’espée : ou
tout sain, vn homme qui est desia fort blessé : Mais si
ce sont auantages, que vous auez gagné en combattant,
vous vous en pouuez seruir sans reproche : La
disparité & inegalité ne se paise & considere, que de
l’estat en quoy se commence la meslée : du reste prenez
vous-en à la fottune. Et quand vous en aurez
tout seul, trois sur vous, vos deux compagnons
s’estant laissez tuer, on ne vous fait non plus de tort,
que ie ferois à la guerre, de donner vn coup d’espée à
l’ennemy, que ie verrois attaché à l’vn des nostre, de
pareil aduantage. La nature de la societé porte, il y
a trouppe contre trouppe (comme où nostre Duc
d’Orleans deffia le Roy d’Angleterre Henry, cent
contre cent : trois cens contre trois autant, comme
les Argiens contre les Lacedemoniens : trois à trois,
comme les Horatiens contre les Curiatiens,) Que la
multitude de chaque part, n’est consideré que pour
vn homme seul : Par tout où il y a compagnie, le hazard
y est confus & meslé. I’ay interest domestique


page précédent(e)

page suivant(e)