Anonyme [1649], ODE SVR DOM IOSEPH DE ILLESCAS PRETENDV ENVOYÉ DE L’ARCHIDVC LEOPOLD. , françaisRéférence RIM : M0_2582. Cote locale : C_8_3.
Or Espagnol ou Francois Ou tous deux, vaille que vaille, Vous estes tout d’vne voix, Sifflé iusqu’à la canaille ; L’escharpe d’incarnadin, Ne pare en vous qu’vn badin, Qu’vn homme à timbre malade Et de loing comme de pres, Le peuple fait pettarrade, Dés qu’il voit Monsieur, l’Expres.
En vain Monsieur l’Enuoyé, Pour eterniser nos noises, Vous auez tant employé Les Marguerites Françoises ; En vain, peu ruse matois, En assez mauuais parois Vous faites ce preambule, Où vous parlez d’vn secours, Aussi foible & ridicule, Que l’est vostre beau discours.
Vantez moins superbement La puissance de Castille ; D’Espagne on veut seulement, Des gans, & de la pastille ; La France la connoist bien, L’on sçait qu’elle ne peut rien, Que sa foiblesse est extréme ; Sans la mort de Richelieu, Vostre Monarque luy-mesme N’auroit plus ny feu, ny lieu.
|