MOTIFS ET RAISONS PRINCIPALES
du Parlement de Rouen pour sa ionction auec
celuy de Paris.
LA corruption du siecle ou nous viuons maintenant
est si grande, qu’il s’est rencontré quantité
de personnes mal fondés dans la Morale &
dans la Politique, qu’ils ont souuẽt interpretées
sinistrement les actions des autres, ou par crainte
d’vn issuë contraire à leurs desirs, ou faute
d’en bien reconnoistre les circonstances. I’ay remarqué cette
verité dans la deliberation que firent Nosseigneurs de Parlement
de la ville de Rouen sur la Lettre qui leur fut enuoyée
des Cours Souueraines de Paris, pour les requerir de s’vnir
estroittement ensemble contre les efforts de leurs communs
ennemis Le succez de cette affaire semblant douteux à des esprits
peu practics, leur fit porter des iugemens que l’issuë deuoit
necessairement tromper à moins que de soupçonner la
sagesse de cette auguste assemblée, qui sembloit estre induitte
à se lier fortement auec le Parlement de Paris, principalement
pour huict motifs & raisons de grand poids & dignes de consideration.
Premierementie dis que l’vnion de la Cour du Parlement
de Rouen auec celle du Parlement de Paris estoit necessaire
& infaillible dans la conioncture des affaires presentes, & ce
d’autant qu’il estoit impossible qu’vn sage Conseil & vn Senat
aduisé comme est celuy de Rouen, voulut abandonner le
seruice de son Roy, dont il voyoit l’authorité ébranslee par