Anonyme [1651], MOTIFS DE LA RETRAICTE DE MONSIEVR LE PRINCE , françaisRéférence RIM : M0_2503. Cote locale : C_11_6.
page précédent(e)

page suivant(e)

-- 5 --

On a veu Monsieur le Prince demander iustice
au Parlement, on sçait auec quels artifices ses Ennemis
ont fait languir son innocence iusques au
derniers iours de la minorité, apres beaucoup de
remises ; enfin il a semblé que les iustes plaintes
de Monsieur le Prince eussent esté exarcées, puis
que par vne Declaration verifiée dans le Parlement,
& depuis publiée le Roy tenant son lict
de Iustice, sa Maiesté a reconnu que les soupçons
& les aduis qu’on luy auoient donnez estoient
tres-faux, & que Monsieur le Prince estoit innocent
de toutes les calomnies qu’on luy auoit imposées.
Cette reparation auoit obligé son Altesse
d’oublier toutes les iniures qu’on a faites iusques-icy
à son innocence & à sa reputation ; Monsieur
le Prince de Conty en auoit donné les asseurances
à sa Maiesté ; Monsieur le Prince les auoit confirmées
par ses lettres, lors qu’à son grand regret il
a connu que toutes les satisfactions qu’on luy
donnoit, n’estoient qu’imaginaires, & que les
actes authentiques de la iustice qu’on luy rendoient
n’estoient que des pieges que l’on dressoit
à sa liberté ; il a veu l’establissement d’vn Conseil
fait par les ordres du Cardinal Mazarin, sans la participation
de Monsieur le Duc d’Orleans, & sans
la sienne ; il a veu que l’on refusoit à S. A. R. deux
iours qu’elle demandoit pout pacifier toutes choses,
& qu’auec vne fierté extraordinaire on mesprisoit
l’entremise d’vn Prince qui a si bien merité
de l’Estat, & si dignement seruy le Roy durant



page précédent(e)

page suivant(e)