Anonyme [1651], MOTIFS DE LA RETRAICTE DE MONSIEVR LE PRINCE , françaisRéférence RIM : M0_2503. Cote locale : C_11_6.
page précédent(e)

page suivant(e)

-- 4 --

rendre ses respects au Roy, il se retira en sa Maison
de S. Maur, & apres auoir informé le Parlement
des iustes causes de sa retraite il fut arresté
que pour faire cesser ses deffiances on éloigneroit
des Conseils du Roy trois personnes qui luy
estoient suspectes par l’attachement qu’elles
auoient au Card. Mazarin. Tout le monde sçait
qu’incontinent apres Monsieur le Prince se rendit
au Palais Royal, mais qu’il y fut si mal receu,
que M. le Duc d’Orleans luy dit qu’il ne croyoit
pas qu’il y peust retourner en seureté, & qu’il ne
vouloit point luy donner vn Conseil, de l’euenement
du quel il ne pouuoit estre garand.

 

Depuis ce temps-là ces mesmes ennemis qui
broüillent l’Estat depuis tant d’années pour leurs
interests particuliers, afin de satisfaire à leurs passions,
ont continué leurs factions & leurs caballes,
& pour executer les pernicieux desseins qu’ils
ont faits contre la personne de M. le Prince, ils ont
persuadé à la Reyne d’enuoyer au Parlement vn
escrit plain de calomnies contre la reputation de
son Altesse. Monsieur le Duc d’Orleans qui sçait
combien l’vnion de la maison Royalle est necessaire
pour le repos public, & qui connoist la sincerité
des intentions de M. le Prince enuoya vne
Declaration par laquelle il iustifioit entierement
sa conduite, & condamnoit les mauuais conseils
de ceux qui auoient surpris sa Majesté.



page précédent(e)

page suivant(e)