ville, & particulierement à ceux des huict millions.

Mais il y a encore vne plainte tres-considerable. Il est
notoire à vn chacun que les Receueurs retiennent par leurs
mains vne partie des sommes que l’on porte à l’Hostel de
Ville, en faisant bien souuent de fausses Fueilles, ou employans
des noms de creanciers feints & supposez. Et cét
artifice leur est d’autant plus facile, qu’il est toleré par les
Officiers de Ville, lesquels par ce moyen les obligent de
payer qui bon leur semble, & qui bien souuent sincopent
les sommes pour en fauoriser leurs amis au prejudice
du public. Voila ce qui concerne les contrauentions qui
se font tous les iours dans l’ordre des payemens, ausquels
l’on ne sçauroit pouruoir qu’en establissant de notables
Bourgeois Rentiers, qui seront presens aux payemens,
lesquels seront changez tous les quinze iours, ou confirmez,
si on iuge qu’ils soient plus necessaires que les autres,
& qu’ils ayẽt fort bien satisfait à leur charge & à leur deuoir.

Quand aux contrauentions qui regardent le reculement
des quartiers, & le manquement de fonds, qui a esté accordé
par les Declarations du Roy, les Rentiers peuuent dire
qu’il s’en trouue sur toutes les natures.