Ils commencent à la verité par des Remonstrances
dans les affaires publiques, auparauant que
donner Arrest, parce que leurs deliberations regardant
pour lors le gouuernement, & se reflechissant
en quelque façon sur la conduite du Prince, Ils doiuent
luy faire entendre les consequences de l’entreprise
que l’on fait contre la Loy, & rendre ce respect
au Roy de l’aduertir du mal auparauant que
d’y apporter le remede.

Voyons de quelle façon les choses se sont passées
quand on a chassé le Cardinal Mazarin, & si on a
gardé les ordres publics.

Quels estoient ses Accusateurs ? tous les Peuples
opprimez, toutes les Loix violées, la Paix rompuë,
des Parlements entiers interdicts, la proscription &
l’emprisonnement des plus illustres Magistrats, enfin
trois Princes prisonniers, Monsieur le Duc
d’Orleans Oncle du Roy, premier Prince du Sang,
& Lieutenant general de la Couronne, qui s’estoit
plaint plusieurs fois dans le Parlement de son gouuernement
& de sa Tyrannie.

Y auoit-il quelque Loy qui fust contraire au Ministere
du Cardinal Mazarin ? Il y auoit la premiere
Loy de tous les Estats du monde, quine souffrent iamais
d’Estrangers dans le maniment des affaires. Y
en auoit il vne particuliere parmy nous ? Nous auons
l’Edict de Loudun, lequel ne veut pas que les
Estrangers ayent seulement le moindre benefice
dans le Royaume & la moindre Capitainerie. Nous
auons l’Arrest rendu contre le Mareschal d’Ancre,