Anonyme [1649], FACTVM CONTENANT LES IVSTES Deffenses des Rentiers de l’Hostel de Ville de Paris: Et les moyens veritables de la seureté de leurs Rentes, & de leur conseruation. , françaisRéférence RIM : M0_1360. Cote locale : A_4_2.
page précédent(e)

page suivant(e)

-- 22 --

au mois d’Octobre 1638. ils auoient vn fonds de plus de cinq
millions trois à quatre cens mille liures, qui leur restoit entre
les mains, ils furent au Conseil, auec lequel ils composerent
de ce fonds, qui leur estoit demeuré. Et parce que les Rentiers
venans à prendre connoissance de ce qui leur auoit esté laissé
de fonds dans les estats du Roy pour les années 1637. 1638.
1639. & 1640. il y auoit à craindre qu’ils ne poursuiuissent les
Adjudicataires pour le payement de ce qui leur estoit deub,
ils firent faire vn nouuel estat general au mois de Iuin 1640.
des années 1638. 1639. & de l’année 1640. & supprimerent les
estats desdites trois années. Et par cét estat general ils firent
arrester que le Roy n’auoit laissé que treize millions, & quelque
chose de plus de fonds pour lesdites trois années, lesquelles
estant distribuées par chacune année, il ne se trouuoit que
deux quartiers, & quelque chose dauantage de fonds pour les
rentes & charges, au lieu des trois quartiers, que le Roy auoit
laissez dans les estats anciens de chaque année.

 

La suppression de ces estats particuliers ne desire point de
preuue, parce qu’il est de notorieté publique, que tous les ans
on fait vn estat des Gabelles, & que l’on n’accumule iamais
les années.

Mais les demandeurs en ont la preuue par plusieurs Arrests
du Conseil, qui ont esté rendus, tant auparauant ce pretendu
estat general de 1640. que depuis, par lesquels le Roy declare,
qu’il a fait fonds pour quatre quartiers és années 1637. pour
trois quartiers en 1638. 1639. & 1640. tellement que l’on ne
peut pas voir vne volerie semblable à celle faite par les Adjudicataires
dans le fonds desdites Rentes, il faut qu’ils demeurent
d’accord, ou qu’ils n’ont payé que deux quartiers, &
quelque chose dauantage és années 1638. 1639. & 1640. au
lieu de trois quartiers qu’ils estoient obligez de payer, ou bien
qu’ils ont diuerty le fonds de trois quartiers, qui sont les premiers
neuf mois de l’année 1638. pendant lesquels ils ont païé
constamment du fonds destiné pour l’année 1637. & qu’ils deuoiẽt
auoir fourny dés le dernier Decẽbre de la mesme année.

Mais les Adjudicataires se sont bien seruis d’autres inuentions
pour faire leurs larcins honteux & punissables. Outre les
grandes & extraordinaires remises pour les prests & les aduances



page précédent(e)

page suivant(e)