le Duc d’Orleans, pourueu que ie luy donnasse parolle d’oster
Chauigny de la posture de pouvoir entrer dans les affaires,
& d’y auoir part cy apres, & que ie le ferois emprisonner.

Ie m’aperceus incontinent de sa ruse, & de là i’ay commancé
vne bonne & ferme esperance de me deffaire aysement
de l’vn & de l’autre ; & que commençant par Chauigny
ie viendrois bien à bout de la Riuiere auec le temps
par le moyen d’vne ligue que i’auois desia commencée
auec le Prince de Condé, qui a tousiours eu dessein d’empescher
autant qu’il pourroit la promotion de la Riuiere,
par lequel le Prince apprehende qu’il ne vueille gouverner
l’Estat pendant la Regence s’il deuenoit Cardinal, & croit
qu’il luy seroit aysé de le faire en se seruant de l’authorité de
son Maistre, & qu’ainsi il seroit à la mercy de l’ambition de
ce faquin & sujet aux foiblesses du Duc d’Orleans.

Me voylà donc ligué auec la Riuiere pour faire chasser
entierement Chauigny, & en mesme temps ligué contre la
Riuiere auec le Prince de Conde, à qui i’auois promis d’empescher
de tout mon pouvoir, & à Rome, & enuers la Reyne,
la promotion de la Riuiere, pourueu qu’il voulut en
temps & lieu declarer que le Prince de Conty son frere
vouloit estre Cardinal.

Sur ces entrefaites, ie fais resoudre au Conseil l’emprisonnement
de Chauigny, & enuoyé le Sieur le Tellier de Ruet,
où la Cour estoit, à Paris, & luy donné ordre de le faire arrester
dans son propre gouvernement du Bois de Vincennes :
I’en fus en mesme temps donner aduis à la Riuiere,
qui en sauta de ioye, & me promit derechef, que Monsieur
le Duc d’Orleans me protegeroit hautement contre tous
& enuers tous.

Le jeu de la Riuiere faisoit des merueilles pour moy dans
ce moment par la ioye qu’il auoit de voir son ennemy renuersé :
& l’esperance qu’il auoit que son Chapeau de Cardinal
arriueroit apres Noël, & qu’à l’heure il auroit entrée au
Conseil où estant il feroit son compre, qu’il viendroit aysement
à bout de moy par l’authorité de son Maistre.