Anonyme [1649], LETTRE DE LA REYNE D’ANGLETERRE, A LA REYNE REGENTE, En faueur de la France, & pour la Paix du Royaume. , françaisRéférence RIM : M0_1943. Cote locale : A_5_81.
page précédent(e)

page suivant(e)

-- 5 --

pour vous persuader par mon raisonnement, les choses
necessaires pour attirer les benedictions de vos Sujets
& l’affection des Peuples, au moins seruez-vous de mon
exemple, & voyez quel est l’estat pitoyable où vn peuple
aussi barbare qu’inhumain m’a mis. Ie sçay que vostre
Maiesté me peut obiecter qu’elle est absoluë, mais aussi ie
luy repartiray, que ce sont les Peuples qui font les Roys,
& les Roys doiuent maintenir les Peuples, au lieu de les
laisser gemir sous l’esclauage & tyrannie d’vn celebre
Tyran.

 

Les Orateurs, MADAME, ne trouuent assez de figure
dans leur art pour donner des Eloges à la Vertu, aussi ils
ne peuuent trouuer assez d’Eloquence, pour decrier le
vice. L’Ecriture coniointe à la Foy nous enseignent, que
deux ou trois hommes de probité & vertueux, leur deposition
doit estre valide & non suspecte d’aucun reproche,
& partant que foy doit estre adioustée à leur deposition.

Ce ne sont deux ny trois mil hommes qui deposent
que Mazarin est faussaire, proditeur, repugnable à l’Estat,
criminel de leze Maiesté, seditieux, perturbateur du repos
public, ennemy du Roy & de ceux que Dieu luy a
sousmis, mais plus de dix millions se plaignent de ses iniustices,
concussions & volleries ; & partant, ie coniurerois
volontiers vostre Maiesté, de ne se rendre implacable
aux exorations d’vne pauure Reyne, qui n’est pas moins
affligée d’entendre tant de lugubres accens & voix plaintiues
qui donneroient de la pitié à l’air, n’estoit son insensibilité,
que l’estat deplorable auquel l’infidelité,
cruauté & inhumanité d’vne nation peruerse l’a reduite.

De tous les Estats qui composent le Monde, n’y en a



page précédent(e)

page suivant(e)