mort qu’ils luy ont faict endurer, sont trois puissants
motifs qui vous doiuent porter à vous resoudre
à perdre la memoire de vos souffrances, esmeu
de l’espoir & de l’esperance que la iustice du droit
des gens, fauorisera si bien mes entreprises, que ie
rendray satisfaits vos mannes, & tranquilles par
vne legitime punition. Ie ne vous entretiendray
pas d’auantage de vos desplaisirs, que ie desire diminuer
par le recit que ie vous veux faire de mon
euenement à vostre Empire de Perse & de Constantinople,
que i’appellerois ioyeux si vostre
mort ne me l’auoit rendu trop funeste. Vostre
Haustesse agréera (s’il luy plaist) que ie vous raconte
les ceremonies dont on a vsé à mon couronnement
le huictiesime du mois d’Aoust dernier,
ayant esté circoncis le lendemain, & tandis que ie
reprenois mes forces beaucoup diminuées, tant
par le sang que i’auois perdu, que par la douleur
que i’auois soufferte, l’on transfera vos femmes
du Palais dans le vieux Serail, à la reserue de mon
ayeule & de ma mere vostre femme, apres quelques
iours ie fus obligé d’aller prendre l’espée, &
d’acquiescer à mon couronnement, & mon eslection
en ceste sorte. Le 6. du mois à la pointe du
iour, ie fus conduit à la Mosquée de Sobuancheny,
souz vne tribune au milieu d’vne grande Cour
située sur quatre pilliers de marbre, & le Musty

page précédent(e)

page suivant(e)