tout ensemble destiné à la tuerie & au pillage, qu’il
seroit inexcusable, & meriteroit l’auersion generale
de toute la terre : Aussi ceux qui traitent si mal la verité
dans leur bouche, qui la deschirent auec la reputation
d’vn Prince, si audacieusement & si indignement,
pour contenter leur passion seule aux despens
du public & de l’Estat, qui la corrompent si indiscretement
& si imprudemment, lors qu’ils ne peuuent
l’effacer pour seduire vn chacun, & leur imprimer les
caracteres de leur malice, meriteroient des tortures
outre nostre auersion, nous causant par là des maux
infinis & de longue durée. Dautant que ces Ministres
d’iniquité se persuadans d’auoir encore à Paris beaucoup
de Partisans, dont l’experience nous fait voir
qu’ils n’en manquent pas, trauaillent sur ces mesures,
& reprennent haleine quand ils voyent leurs abominables
desseins soustenus auec tant d’audace, & si
peu de iugement, que dans le mesme texte où l’on
represente Monsieur le Prince chercher la ruine de
son armée, pour en tirer des vtilitez imaginaires, & le
faire de concert auec la Cour, on le met à la teste d’icelle,
& confesse-on qu’il n’auoit pas cette pensée,
auec telle addresse & subtilité neantmoins qu’estans
contrains de se dédire & de se contredire, ne pouuans
celer le plus grand exploit de guerre qui ait iamais
esté fait, on le décrie dans ses circonstances par
de petites inuentions friuoles, & sans apparence ny
solidité quelconque. Car on tasche de persuader que
Monsieur le Prince deuoit faire la retraite qu’il premedita

page précédent(e)

page suivant(e)