LES TRAHISONS
descouuertes de Mazarin dans le
Conseil de la Reine, pour empescher
la Conference de Messieurs
les Deputez.
LA Clemence, la Iustice, la bonne Foy, & la sincerité
des Souuerains, sont les vrais caracteres de leurs puissances,
& les fondemens inébranlables de leur Estat,
par contradiction, la rigueur, la fourberie, la mauuaise
Foy, & l’injustice d’vn Potentat, sont les marques infaillibles
dans la conduite d’vn Monarque, d’vn Estat, qui ne peut
point subsister long temps, estant tout autant de puissantes secousses
qu’il redonde à son authorité toutes les fois qu’il agit par
le principe detestable d’vne de ses quatre sources de malediction.
C’est cette verité que nous pouuons appuyer par autãt d’exemples,
que l’Histoire nous apprend qu’il y a eu de Fauoris tyrans,
qui nous doit faire apprehender auec beaucoup dé raison, que le
Cardinal Mazarin a plus d’enuie d’en leuer le Sceptre d’entre les
mains du Roy, que de se maintenir dans le ministere, puis qu’il
n’y a point d’infidelité, de rigueur, de fourberie, & d’injustice,
dont il ne se seruoit impunement, pour nous faire conceuoir le
pouuoir absolu de Sa Majesté, comme l’instrument qui ne sert
plus desormais qu’à l’execution de ses funestes entreprises. C’est
dis je cét infame commerce qu’il entretient sous le sacré nom de
sa Majesté, pour sur prendre les foibles, qui nous donnent vn legitime
soupçon du mauuais dessein qu’il conçoit infailliblement
contre la Royauté.
C’est pourquoy dans l’éclaircissement que ie m’en vay vous
en donner, vn chacun pourra facilement connoistre, que tout ce