sous vn faux pretexte, de ce que ce Cardinal qui
supposa faussement que dans le Parlement, il y
en auoit qui auoient toute intelligence auec les
ennemis de l’Estat, à intention de ce saisir de la
personne du Roy, lequel pour sa seureté estoit
sorty de Paris, pour se retirer à Sainct Germain en
Laye : retraitte qui fut suiuie du Blocus de Paris ;
Ce mal-heureux pretendant que dans la disette
des viures, l’on verroit le menu peuple sousleué
contre les Bourgeois, qui eust mis cette grande
Ville en vn estat tel que les massacres, les bruslemens
& les pilleries ont enseuely dans ses ruines
tous ses Habitans, & tel estoit le desir detestable
de ce Cardinal.

 

Cela n’ayant reüssi comme il pretendoit, il a
fait en sorte qu’il a eu des creatures dans les Conseils
du Roy, au Parlement, à la Chambre des
Comptes, à la Cour des Aydes, au Chastelet, à
l’Hostel de Ville, & dans les six Corps des Marchands,
parmy les Colonels & Capitaines, en si
grand nombre, qu’au iour de l’attaque du Fauxbourg
de S. Anthoine, entreprise par ses ordres,
il se promettoit par cette grande intelligence se
rendre Maistre de cette grande Ville, & de se
vanger de ceux qui luy estoient contraires.

Mais sur tout, il a bien fait voir qu’il vouloit