Anonyme [1649], LES RAISONS OV LES MOTIFS VERITABLES DE LA DEFFENSE DV PARLEMENT & des Habitans de Paris. Contre les Perturbateurs du repos public, & les Ennemis du Roy & de l’Estat. , françaisRéférence RIM : M0_2967. Cote locale : C_9_5.
page précédent(e)

page suivant(e)

-- 17 --

pas de deuenir generale, la Loy du Prince en cela ne deuant
point estre differente de celle des particuliers, principalement
le Roy ayant tous les reuenus, & toutes les choses necessaires
pour la manutention de l’Estat.

 

A l’esgard du Parlement, il se remua pareillement d’vne
contrauention si manifeste à la derniere Declaration, qui
alloit acheuer la ruine de l’Estat, & absorber tous les reuenus
du Prince.

Les Ministres voyant donc que si l’on entretenoit la Police
du Royaume & les Loix dans leur vigueur, qu’ils ne seroient
plus les Souuerains, & qu’il y auoit à craindre que ces mesmes
Loix qu’ils auoient tant de fois violées, ne demandassent
Iustice de tous les crimes qu’ils auoient commis contre
le repos & la felicité des Peuples, ils prennent encore la
resolution de perdre l’Estat, ou de perdre ceux qui les auoient
ainsi rappellées, & qui les vouloient faire triompher de tant
de parricides & d’attentats qu’ils auoient faits à la seureté
publique, & à la Majesté du Souuerain.

Ils gaignent incontinent le Prince de Condé, lequel s’engage
facilement dans vn si malheureux party, sous pretexte
de recompenses imaginaires, & de luy donner des Places
Frontieres : sçauoir Stenay, Iamets & Clermont en droit de
Souueraineté, par le moyen desquelles ce ieune Prince pretendoit
se donner de la reputation, & entretenir son ambition
naturelle.

Ce n’estoit pas assez, il falloit aussi faire tremper dans cét
horrible attentat le Duc d’Orleans. Sa resistance fut grande
par la bonté & la douceur de ses mœurs, mais son esprit estant
assiegé depuis plusieurs années de l’Abbé de la Riuiere, qui
l’a trahy tant de fois, & dont les mœurs sont aussi corrompuës
& aussi basses que la naissance, le charme se respandit encore
sur cette premiere personne du Royaume, qui consentit à
ce pernicieux complot.

Le Cardinal Mazarin & ses complices ne donnerent pas le
temps à ce Prince de faire seulement reflexion sur vne entreprise
si perillieuse & si criminelle. Aussi-tost la resolution prise,
on l’enleue de son lict le iour des Roys à trois heures du



page précédent(e)

page suivant(e)