Craindrons-nous donc desormais que ces ames brutalles, de
qui la sagesse n’est que folie, la Prudence que temerité, l’Amour,
que haine, d’vne precipitation toute furieuse, viennent
à se desgorger de nouueau, dans le sein de nos campagnes, pour
y enseuelir, & l’obiet de nos esperances, & l’vnique fondement
de nos fortunes, si le bras de la Iustice, qui estend si-tost, si
loing, & sa force, & son authorité, que si nous iettons la veuë
sur la Maiesté de vos trois Princes, France, qu’auez vous à
trembler, Paris, que vous sert de craindre, vne si legere disgrace,
lors que vous considerez vostre peuple tousiours sous les armes,
parce que tousiours tres genereux.

Et le voyez plus satisfait des soins, & des veilles, qu’il prend
pour la conseruation de son Roy tres. Chrestien, que de quelque
affliction, qui peut iournellement succeder aux maux,
pour lesquels vous compatissez aussi bien que luy. N’ignorant
pas que si la blessure est grande, vous vous en sentirez dauantage,
que d’vn autre costé, si le plaisir est grand, vous en serez
le premier participant ; & comme legitimé heritier de la bonne
ou mauuaise fortune, qui se peut aisement communiquer
à vn grand party, vous serez le plus heureux, ou le plus malheureux
du monde.

Mais que dis-je, mal-heureux ? non, non, le mauuais destin
vous a quitté, Paris, le mauuaise fortune vous a abandonnée,
le Sicilien ne se chargera plus du lourd fardeau de la France.
Les fureurs ont ceddé la plance. Le mauuais Genie de l’Estat
n’a pas reüssi, nos Princes ont la victoire Paris, vous aurez le
dessus ; est ce estre mal-heureux que d’estre affranchy des vns,
& posseder les autres.

Ouy, c’est vn bon heur de n’estre plus sous la conduite d’vn
si mauuais Ministre, qui fait son profit, & bastit ses aduantages
de toutes les rencontres, sans communiquer vne partie de
ses fortunes à ceux-là mesme qu’il deuoit rendre les plus heureux.

Ouy, c’est vn grand bon-heur, de posseder, & ce que l’on desire,
& ce qu’on ayme France, vous en jouyssez & voulez-vous
encore vn surcroist de faueurs plus eminent, vos desirs sont-ils
encore logez à l’Esperance.

Paris aspirez-vous à aucune grace plus particuliere ? demandez-vous