Dieu ? de là ie concluray que bien souuent les
cruels, & les méchans hommes, sont les instrumens
auec lesquels Dieu chastie les pechez, &
recõpense les vertus, & neantmoin ils ne laissent
pas pour cela d’estre scelerats, & dignes de punition
de ce qu’ils font, pour ce que selon la parole
du Seigneur, il est besoin que scandalle arriue :
mais mal heur â ceux par qui le scandalle auient.
Quoy qu’il en soit, iamais Dieu ne laisse les Tyrans
impunis dans le monde, outre qu’il les sçait
chastier éternellement d’vne punition perdurable
en l’autre vie, & iamais l’on n’a remarqué
qu’vn cruel soit mort que cruellement. Phalaris,
Tyran de Sicile, ne mourut il pas luy mesme dãs
le Taureau d’airain, où il faisoit mourir ses sujets,
rendant à sa mort par son horrible voix, la méme
harmonie, qu’il auoit tant de fois pris plaisir
d’oüir par le trepas de ceux qu’il condamnoit à ce
cruel supplice ? Sylla fut tellement attaqué par
les poux, qu’il fut impossible d’y remedier, & il
mourut en se mordant, & arrachant luy méme
sa chair. Marius son capital ennemy, aussi cruel,
& aussi méchant, fut reduit en vn si grand desespoir,
s’enfuyant pour se cacher ; qu’il alla mettre
sa teste entre les mains de Ponse Thesselin,
affin qu’il la luy coupast. L’Empereur Tybere
suffoqué par vn oreiller, mourut entre les mains
de ses domestiques, & Suetone dit pourtant, que
sa mort fut causée par le poison. Apres que Caligula

page précédent(e)

page suivant(e)