Parisiens vous aiment de tout leur cœur ; mais ils
veulent vn mal enragé à Monsieur le Cardinal, &
voudroient tous l’egorger s’ils pouuoient.

Le Roy. Mais pourquoy est-ce donc que ma bonne
maman le veut garder, puisque tout le monde
luy veut mal, pour moy ie luy veus bien mal
aussi ?

Monsieur. Et moy aussi, ie voudrois bien qu’il
fut bien loin.

Le Roy. Ie m’estonne pourquoy on le garde.

Monsieur. Mon petit papa, c’est que tout le monde
croit qu’il a ensorcellé ma bonne maman.

Le Roy. Comment ensorcellé.

Monsieur. Qu’il luy a donné des characteres, afin
qu’il soit bien puissant.

Le Roy. A mon oncle le Duc d’Orleans, luy en
a-t’il donné aussi ?

Monsieur. On dit qu’ouy.

Le Roy. Et à mon cousin le Prince de Conde ?

Monsieur. On dit aussi qu’il luy en a donné.

Le Roy. Iesus ! il est donc bien meschant.

Monsieur. Vrayment ouy, il est bien meschant, il
est si meschant qu’on dit qu’il a vn diable familier.

Le Roy. O bon Dieu ! n’approchons donc plus de
luy.

Monsieur. Pleut à Dieu.