Anonyme [1652], LES CONVVLSIONS DE LA REYNE LA NVIT DE DEVANT LE DEPART DE MAZARIN. Auec la consolation qu’elle receut par l’apparition d’vne bonne Sainte, Cause de la resolution qu’elle a prise de ne plus souhaiter le retour du Mazarin, de peur de mettre son Royaume en combustion pour la troisiéme fois. , français, latinRéférence RIM : M0_791. Cote locale : B_4_21.
page précédent(e)

page suivant(e)

-- 12 --

Mazarin, elle estoit preoccupée de l’opinion
qu’il estoit seul pourueu d’vne prudence assez grande
pour remplir la place du feu Cardinal de Richelieu :
Elle le voyoit aimé pour l’amour d’elle, de
tout le monde, & voyoit que les affaires de France
succedoient au commencement de sa Regence, le
plus heureusement qu’elle eust iamais pû souhaiter,
& sçauoit qu’on en donnoit vne partie de la gloire
à son Ministre, à qui le témoignage recent du feu
Roy estoit tres-fauorable. Dans ce rauissement elle
luy donna premierement sa croyance, puis vne
partie de ses affections. Voulant paroistre aussi genereuse
enuers luy, que le feu Roy fut bien-faisant
enuers l’autre Cardinal, elle crut que le laisser pauure
dans vn Royaume reputé si riche, seroit moins
vne marque de sa foiblesse que de son ingratitude.
Et comme la misere du peuple n’estoit pas presente
à ses yeux, & qu’elle, ne pouuoit oüir de si loin les
plaintes & les cris des miserables, que les exacteurs
persecutoient, pour en tirer de l’argent à proportion
de leurs taxes, elle ne croyoit pas que luy dõner
vn million estoit souuent tuer vn million d’innocens,
& mesmes des enfans dans le berceau : c’est
ce qui la rendoit plus hardie à luy faire beaucoup
de largesses, qu’il estoit tousiours en humeur d’accepter,
sans dire iamais c’est assez, non plus que
l’Enfer. D’ailleurs, elle n’auoit qu’a dire vn seul
mot pour estre obeye, parce que les Officiers des
Finances estans de la faction de Mazarin, & corrompus


page précédent(e)

page suivant(e)