Prince, & au Parlement, que Leurs Majestez
souhaitoient auec passion que toutes les
choses se pacifiassent, & que l’on traittast
d’accommodement, à quoy sadite Altesse
Royale ayant témoigné estre entierement
portée, elle deputa, du consentement de
Monsieur le Prince, Messieurs les Duc de
Rohan, Comte de Chauigny, & de Goulas,
Secretaire de sadite Altesse Royale,
pour aller à Sainct Germain en Laye, auec
pouuoir de conferer, & d’auiser au moyen
de faire cesser les troubles. Pour lequel effet
lesdits sieurs Deputez estans partis Samedy
vingt-septiesme de ce mois, sur les cinq heures
du soir arriuerent ce mesme jour à Saint
Germain, où ayant salué Leurs Majestez,
qui témoignerent estre grandement satisfaites
de leur venuë pour vn si bon sujet, remirent
la conference au lendemain matin, lequel
jour furent proposez pour accommodement
les Articles suiuans.

Premierement : Que Son Altesse
Royale, Monsieur le Duc d’Orleans,
seroit continué Generalissime
des Arméés de Sa Majesté, de la mesme