Si vous n’auez mérité ce blasme pour les
actions à qui l’on l’attache, vous l’auez merité par
mil autres qui ont surpris les yeux des hommes,
& qui ont passé d’ans l’estime de la vertu, quoy
qu’elles fussent des offences contre Dieu ; souffres
à cette heure cette compensation d’iniures, que
vous soyez blasmé pour le bien, comme vous
auez esté loüé pour le mal. Dés cette heure mesme
sans le secours de la grace, vous tomberiez
dans tous les crimes que l’on vous impose : souffrés
donc que la voix publique chastie vos mauuaises
inclinations de ce reproche : receuez-le
comme vn preparatif & vn remede de la vanité.

Peut estre que cette Calomnie vous fermera
l’entrée de la faueur, des charges, des grandes
fortunes, mais vous n’en estimerez pas pour cela
vostre condition moins heureuse, si vous considerez
le monde d’vn autre œil que celuy de l’opinion.
Vous auez sujet de loüer Dieu auec le Prophete
de ce qu’il aura fait éclater ses foudres pour
guérir vos sterilitez par vne pluye de benedictions.
Ces dix ou douze personnes chez qui vous
n’estes pas en estime, sont elles considerables
dans vne grande ville, dans vn Royaume, dans le
monde dont vous estes le Citoyen ; & si vostre
nom n’y est pas connu, vostre personne y peut paroistre
auec la commune creance de probité qu’õ
a de chacun. Rentrés en vous mesme dans ces grands