celuy dont l’authorité fait nostre bon heur & le
vostre, ne iustifient que trop la ferme resolution
auec laquelle nous allõs nous ietter dans les affaires
pour les pousser entierement à bout : & pour ne
consentir plus desormais, qu’auec ces amusements
trompeurs, on nous frustre d’vn repos qui seroit
maintenant en vostre possession, si ces belles promesses
dont la Cour a repeu vostre credulité, eussent
eu autant d’effet que d’aparence.

Pour moy, Messieurs, ie pense vous auoir toujours
parlé assez sincerement, puis que ie ne vous
ay iamais parlé que par mes actions. Ie n’ay iamais
voulu d’autres truchemens de mes intentions, que
mes bras. A vos yeux mesme comme vous sçauez
i’ay pris plaisir de prodiguer ma vie pour espargner
la vostre : & ceux qui furent tant soit peu curieux
de monter sur les rempars de la Ville, pour me voir
au Fauxbourg S. Anthoine dans la plus dangereuse
de toutes mes Iournées ; deurẽt ce me semble estre
conuaincus que mes protestations pour vostre seruice
estoient sans reserue, & que j’épousois sincerement
tous vos interests auec autant de passion
que vous le pouuiez souhaiter du plus redeuable de
tous vos obligez, puis qu’il n’estoit point de hazard
au trauers duquel on ne me vit hardiment
voler, pour destourner de dessus vos testes la rempeste
que vos Ennemis estoient sur le poinct d’y
faire creuer ce jour là par le retour de quelques