LE VERITABLE MANIFESTE
de la France, à son A. R. & à Messieurs du
Parlement, sur les desordres des gens de guerres.
GRAND Prince, ie sçay que vous compatissez à ma
disgrace, & que vous meslez de bon cœur vos larmes
auec les miennes, & puis qu’il vous fache extremement
de me voir aujourd’huy reduite au plus déplorable
estat, ou ie pouuois iamais estre : Ie m’adresseray
à V. A. R. pour l’entretenir de ma douleur, & pour
luy demander quelque remede aux maux qui m’accablent,
& qui infailliblement me vont faire perir si
vous n’accourez à mon secours.
Vous auez vne longue & triste experience des calamitez
que i’ay endurees, & sans vous obliger de relire les
guerres que i’ay euës contre les Anglois, & contre Charles
le Quint & Philippes second : Il me suffit de vous dire
que vous n’ignorez pas les troubles que m’ont cause les
Religionnaires dans la plus fascheuse saison de cette Monarchie,
de mesme que ceux de la ligue & les autres guerres
qu’elle a produit, & ie m’asseure que vostre esprit fremit
encores des spectacles d’horreur qui ont paru [1 mot ill.]
temps là sur mon theatre. La fœlicité du regne d’[1 mot ill.]
le grand vostre pere, en auoit reparé toutes les pertes [1 mot ill.]
les François ne se souuenoient plus des disgraces passée
sous Louys treize. Les miseres publiques ont reprise si
profondes racines qu’elles subsistent encores, & les peuples
extremément lassez & autant affoiblis par les victoires