de Dieu & des hommes. Et c’est estre
encore bien ignorant de ne sçauoir pas seulement
parler sa langue maternelle, & se vouloir
entremettre de discourir des affaires d’Estat, &
des matieres de Theologie.

S’il est tres-iustement deffendu aux Commediens
& aux Bateleurs, de se vestir de l’habit de l’habit de
Religieux ; il est encore plus iustement deffendu
aux Bouffons dé se vestir de l’habit de Prestre.
Ha ! que cela est de bonne grace, de voir vn
Ecclesiastique, ne respondre iamais qu’auec des
mots de gueule, & faire parade de sa medisance.
Ce sont la les armes dont nostre Apostat se
sert pour combattre l’authorité des Roys, &
pour faire valoir son abominable doctrine.

Les iniures & les railleries sont plus propres
à irriter vn aduersaire, qu’à le persuader, ny
qu’à l’instruire. Il ny a rien qui offence tant vn
homme de cœur, ny vn homme qui a tant soit
peu l’honneur en recommendation, qu’vne façon
de parler outrageuse. Pour persuader l’esprit
de son lecteur, il faut gaigner sa bien-vueillance
& l’asseurer de la sienne.

Nostre hypocrite à la fausse barbe n’en fait pas
de mesmes : au contraire il ne fait à l’abord qu’vn
salué d’iniures, & si il veut apres cela, que l’on
croye, que c’est par charité, ce qu’il en fait, &
que c’est au nom de Iesus & de Marie qu’il dit
vniuersellement mal de tous, & qu’il nous parle
auec tant d’infamie.