elle pensez vous que me feriez leuer ? Sans tant de cacquet petit garçon leuez.
vous vistement. Ie vois bien que vostre Eminence a haste. Les bonnets
quarrez vous mettent bien la puce à l’oreille. Si vous ne vous en allez bien
viste gare la bourse. Il m’en dit encore bien d’autres, cela me faisoit rire &
si cela ne me plaisoit pas trop.

Le Casuiste. Monseigneur les fols & les enfans disent souuent la verité.
Mais enfin vous sortistes de Paris ; & vous vous arrestastes quelque part.

Le Card. Nous allasmes gagner la porte de la Conference, pour y entrer
en conference, sçauoir si nous demeurerions quelque temps dans le
Cours ou non, enfin il fut resolu, que nous y attendrions quelques personnes
de marque, qui n’estoient pas encore aduerties de nostre depart, &
que cependant il y auroit dix ou douze hommes à cheual, qui iroient descouurir
l’estat de Paris & nous en aduertiroient.

Le Casuiste. Vous me faites resouuenir du rendez-vous du bon homme
Ænée & de ses compagnons sur le Mont Ida, la nuict du sac de Troye.
Mais comme en s’écartant de sa femme, il perdit son support & sa consolation,
de mesme le Roy s’écartant de sa Iustice où est son vray lict nuptial,
il a perdu son plus grand support & sa plus grande consolation.

Le Card. Cette femme n’est pas perduë, le Roy la reprendra quand il
voudra.

Le Casuiste. Vous approuuez donc le concubinage Monseigneur, &
croyez qu’il soit licite aux Roys d’abandonner leur lict de Iustice ? Il est vray
que vostre Politique est vne vraye adultere, qui conçoit dans le peché &
n’engendre que des monstres.

Le Card. Brisons là dessus Monsieur, & permettez que ie vous dise les
pensées & les agitations d’esprit, que i’eus vne heure entiere que nous
fusmes dans le Cours, cependant que la Reyne escriuoit aux flambeaux à diuerses
personnes de condition, qu’elle vouloit aduertir de sa sortie.

Le Casuiste. Que faisiez vous cependant Monseigneur ?

Le Card. Ie me pourmenois à grands pas le long de la riuiere, & m’arrestois
par fois tout court en me tournant, pour regarder, comme la femme
de Loth, cette Sodome que ie venois de quitter.

Le Casuiste. Pourquoy appellez vous Paris Sodome Monseigneur ? On
dira qu’elle n’est telle que depuis que vous & vostre nation Italienne s’y
sont habituez.

Le Card. Sodome ou non, ie luy souhaittois le mesme sort, & disois en
moy mesme, en iettant les yeux fixement vers la place Dauphine. Tu reposes
Ville ingrate, mais que ton sommeil puisse-il estre eternel. Ha que le silence
dans lequel ie te vois, est bien different de cette nuict tumultueuse où
tu me donnas tant d’alarmes, & plus de fois le coup de la mort, que ie ne
vois d’estoilles au firmament ! Tu dors Hydre à tant de millions de testes, toute
enseuelie de vin & de sommeil. Et puis regardant le cheual de bronze,
Que ce cheual disois-je, ne t’est-il aussi fatal, que celuy de Troye, que ne
peut-il enfermer autant de soldats, qu’il en faut pour te saccager ?

Le Casuiste. Vous feriez bien l’Vlysse Monseigneur, car vous sçauez qu’il
estoit surnommé le Rusé.