prendre les armes & hazarder les dernieres extremitez : le Roy
vsant de la prudence necessaire en ces rencontres voulut bien
consentir à la retraite du C. Mazarin : & luy mesme aima mieux
se retirer, que d’estre le pretexte de quelque emportement extraordinaire,
qui eust engagé trop auant l’authorité Royale.

Ce remede neantmoins est inutil pour appaiser la violence du
mal. Cette retraite n’est pas ce que les factieux souhaitoient. Ils
eussent bien mieux aimé que le Cardinal eust opiniastré sa demeure
à la Cour, afin d’auoir le pretexte d’vn sousleuement. Que
feront ils donc. D’vn costé le Parlement apres auoir deputé pour
remercier le Roy de l’esloignement du Cardinal (ce qui estoit vn
compliment iniurieux & desobligeant) rend vn Arrest, par lequel
il enjoint au C. Mazarin de sortir du Royaume & de toutes les terres
de l’obeïssance du Roy : & à faute de ce faire, il ordonne à tous
les suiets du Roy de courir sus & le tailler en pieces.

Il rend encore vn autre Arrest, par lequel il ordonne qu’il sera
informé cõtre luy, & qu’il sera amené prisonnier à la Conciergerie
du Palais, pour luy estre son procés fait & parfait. Si iamais la passion
a aueuglé des Iuges, pour les faire agir contre les formes de la
Iustice & contre la raison, c’est dans cette occasion. Par le premier
Arrest, ils condamnent diffinitiuement vn homme à sortir
hors du Royaume, & à faute de ce, ils arment les sujets du Roy
contre luy pour le tailler en pieces, ce qui est vn bannissement.
N’est-ce pas agir contre les formes, de condamner vn homme
sans plainte, sans information, sans decret, sans l’ouïr, ou le coutumasser.
Par le second Arrest, ils ordonnent qu’il sera informé,
& qu’il sera amené prisonnier : N’est-ce pas agir contre la raison
& contre le bon sens de vouloir qu’vn homme, lequel aux termes
de leur premier Arrest doit estre hors le Royaume & garder son
bannissement sur peine de la vie : soit amené prisonnier pour luy
estre son procés fait & parfait, apres l’auoir condamné diffinitiuement ?

Mais où est escrit le pouuoir qu’ont ces Iuges, de traiter criminellement
vn Cardinal de l’Eglise Romaine ? Ils n’ont pas droit
de Seuir contre vn Euesque, pourquoy l’entreprennent ils contre
vn Prince de l’Eglise ? Le Procureur General en a-il fait vne
seule requisition ? Mais où est le crime, où est l’accusation, où est
l’information ? Il est bien apropos, Messieurs, pour l’interest seul
de la verité ; sans affecter la deffence de ce Ministre que ie n’ay
pas icy entrepris : que vous soyez informez de ce qui s’est passé en
cette rencontre.