Anonyme [1652], ADVIS PROMPT ET SALVTAIRE, DONNÉ PAR LES BONS BOVRGEOIS DE PARIS a Messieurs les Princes, POVR SE RENDRE MAISTRE DES PASSAGES & Villes dés enuirons de Paris, ou il y a Garnisons Mazarines: Pour la conseruãtion de M. le Duc de Beaufort dans le Gouuerment de la Ville: Pour la continuation de M. de Broussel en la Charge de Preuost des Marchands, dont l’Election doit appartenir cy-apres aux Bourgeois: Pour l’Esloignement du Coadiuteur hors de Paris. Et pour perfection des cinquante mil Escus, promis par Arrest de la Cour à celuy qui presentera le Cardinal Mazarin vif ou mort. , françaisRéférence RIM : M0_532. Cote locale : B_17_12.
page précédent(e)

page suivant(e)

-- 4 --

de pauureté, de famine & de douleur :
si vous estes sinceres & bien-intentiones, débouchez
vos aureilles pour escouter les Peuples,
qui vous disent, & qui se plaignent, que
l’esloignement du Mazarin est vne fourberie de la
Royne, & vne ruse de sa Majesté, qui veut se vanger
des Bourgeois de Paris, parce qu’ils vous ont
receu auec applaudissement dans leurs murailles,
& qu’ils ont donné passage par leur ville à
vos troupes, qui alloient seruir de Triomphe à
leur barbare cruauté, & de spectacle odieux aux
bons, aux miserables & aux enfans. Le Mazarin
est hors de la Cour, il n’est plus auec le Roy ; mais
la Reyne y est, qui a l’esprit Espagnol, Italien, &
Mazarin. Le premier President, ce lasche Garde
des Seaux, qui donne son ame & son corps au
Diable pour auancer ses enfans, qui trahit sa patrie
pour en faire vn. Euesque de Bayeux, & l’autre
Secretaire d’Estat ; & qui abandonne sa compagnie,
de laquelle il a esté le Chef : (car il ne
l’est plus, si les Arrests du Parlement sont executez)
pour seruir vn Estranger, Cardinal, Tyran,
Bourreau de la France. Sous le nom de Cardinal,
il ne faut plus entendre vn Prince de l’Eglise,
vn Sainct-Homme, & vn bon Catholique ; mais
vn Prince de Satan, vn Impie ambitieux, & vn
Athée voluptueux.

 

Le Mazarin s’en va à Sedan, & de là à Boüillon,
où il conferera auec le Duc de Lorraine pour



page précédent(e)

page suivant(e)