Et que vostre ame est assez forte,
(Outre la grace qui l’escorte)
De sa propre & seule raison,
Pour tenir le corps en prison,
Au milieu mesme du grand Monde,
Où tousiours le Demon fait ronde,
Vous sçauez dompter vos desirs
Pour la douleurs & les plaisirs ;
Et comme on vous vit inuincible,
Apres vne mort tres-sensible,
L’on vous voit sans infirmitez,
Au milieu de nos vanitez,
Où mainte & mainte qui succombe,
Apres auoir chancelé tombe,
Car helas ! il s’en trouue peu,
Qui ne brusle si prés du feu ;
Peu dont la vertu ne s’estonne,
Et que la chair ne desarçonne,
De fait ou de consentement
Malgré le sainct Commandement.