comme elle a des tiltres & des charmes deuant
les yeux qui l’enchantent, elle verroit que son
Ministre apres auoir tiré comme vne sansuë tout
se sang, & rongé comme vn chancre, ou vne tigne,
toute la substance des François. est à present
comme vne grosse baleine qui ne se plaist qu’à
nager dans nostre sang & dans nos tresors, & que
son effroyable auarice à la gueule tousiours ouuerte
comme vne fournaise pleine d’vn feu deuorant
pour consumer tout le bien de la France ; Et
tout au contraire sa Maiesté cognoistroit que
ceux qu’elle a voulu perdre sont des veritables
gens de bien, qui font gloire de preferer l’interest
& le repos du public au leur particulier, & qui taschent
au peril de leur vie & de leur repos, de procurer
le soulagement à cent millions de François
qui gemissent dans vne misere & pauureté extréme.

Le Parlement auquel le jugement des crimes
appartient, auoit resolu de faire informer contre
plusieurs Partisans qui sous la protection du Cardinal
se sont enrichis si excessiuement, qu’on
peut dire qu’ils ont eu plus d’or & d’argent que
plusieurs Rois, & qu’il n’y a point eu de Princes
en l’Europe qui ayent iamais vescu auec plus de
bombance & de luxe que plusieurs d’iceux ont