Saint-Julien,? [?] [1650], LE COVRRIER BVRLESQVE DE LA GVERRE DE PARIS, Enuoyé à Monseigneur le Prince de Condé, pour diuertir son Altesse durant sa prison. Ensemble tout ce qui se passa jusques au retour de Leurs Majestez. , françaisRéférence RIM : M0_814. Cote locale : A_9_9.
Le Ieudy, iour que Nostre-Dame Sceut que de fille elle estoit femme Par vne Annonciation, Tout estoit en deuotion Quand Lettre de cachet venuë Fit que sceance fut tenuë, Où quand nos Chefs furent venus Tous les premiers propos tenus Furent de sçauoir si la tresve, Ennuyeuse aux gens de la Greve, Et qui finissoit ce iour-là, Passeroit encor au delà : Tresve qui receut anicroche Iusques au Lundy le plus proche, Et compris inclusiuement Par vn Arrest du Parlement.
[5 lignes ill.]
Ce iour à la Ferté sur Iouarre, Vn Mazarin qui disoit, Garre, Qu’on face place à mon cheual, Ie viens pour le party Royal Loger icy des gens de guerre, Fut accueilly à coups de pierre, Et de quelque coup de fuzil, Ie pense que d’vn grain de mil On eust lors bouché son derriere, Heureux de retourner arrïere, Maudissant tout cicatrisé, Le manant mal ciuilisé, Qui depuis garda ses murailles, Crainte du droict de represailles.
Samedy du mois vingt-sept, Vostre frere encor tout mal fait Du reste de sa maladie, Fit declaration hardie ; Que celles que iusques à ce iour Il auoit faites à la Cour De ne faire aucune demande Pour luy ny pour ceux de sa bande, Le Cardinal estant sorty : Que foy de Prince de Conty Ces declarations signées Qu’on auoit iusqu’icy bernées, Receuroient applaudissement, Pourueu qu’il pleust au Parlement, Rendre Arrest, que son Eminence Eust à denicher de la France, Parce qu’il ne pouuoit iamais Autrement conclurre la paix : Que le feu par tout s’alloit prendre S’il n’estoit couuert de sa cendre. Qu’il prioit la Cour d’y resuer Auant mesmes que se leuer ; Surquoy la Cour à sa priere [1 mot ill.] tant sur cette matiere Qu’apres son resue elle a treuué Qu’il auoit le premier resué. Cependant pour faire grimace, Et pour ne rompre pas en face De ce Prince qu’elle honoroit La Cour dit que l’on enuoiroit Insister sur cette retraitte, Qui ne s’est pas encore faitte. Ce iour nous sçeusmes que Ierjay, Du party contraire engagé, Partoit de Sainct Germain en Laye Pour s’opposer à la Boullaye Qui faisoit merueille en Anjou, (Car il n’est pas tous les iours fou, Cõme il n’est pas tous les iours feste) Et puis ce n’est que par la teste Qu’il est fol, quand il l’est pas fois Notamment les onze des mois.
27 Mars
Or ce Marquis à teste seiche Estoit entré dedans la Fleche.
Ce fut
Le Dimãche on sçeut qu’à Bourdeaux Les coups desia pleuuoient à sceaux, Le tout pour la cause commune : L’habitant au clair de la Lune Auoit pris le Chasteau du Hact, Et depuis auoit fait vn pact D’inuestir le Chasteau Trompette ; Cela n’est point dans la Gazette. Ce iour mesme il vint vn Courrier, Qui perdit cent fois l’estrier, Et se pensa casser la teste Tant il pressa sa pauure beste.
| |||||