Saint-Julien,? [?] [1650], LE COVRRIER BVRLESQVE DE LA GVERRE DE PARIS, Enuoyé à Monseigneur le Prince de Condé, pour diuertir son Altesse durant sa prison. Ensemble tout ce qui se passa jusques au retour de Leurs Majestez. , françaisRéférence RIM : M0_814. Cote locale : A_9_9.
[1 mot ill.] Mars
Le Ieudy, les Chefs de nos bandes, Ayant fait chacun des legendes De tous leurs petits interests, Commirent à Ruël exprés Pour porter leurs humbles prieres, Le Duc de Brissac, & Barrieres, Le sieur de Bas & de Crecy.
Le Vendredy dix-neuf, icy Nous sçeusmes que dans la Gascogne La Reine auoit de la besogne, Que le Parlement de Bordeaux Tout prest à joüer des cousteaux, Auoit fait armer à nostre aide. L’action n’en estoit pas laide, Car le Normand & ce Gascon, Et le nostre faisoient tricon.
[1 mot ill.] Mars
Ce mesme iour par vne lettre Thoulouse nous faisoit promettre Que nous pouuions tenir pour hoc Le Parlement de Languedoc, Qui se declaroit pour le nostre, Tellement qu’auecque cét autre, C’estoit vn quatorze bien fait.
Le Samedy ny beau ny laid, Ny chaud ny froid, à l’Audience Nos Generaux prirent seance, Et-là dirent tous d’vne voix, Qu’ils auoient donné cette fois Des propositions à faire, Mais qu’ils l’auoient crû necessaire, Monsieur le Cardinal resté, Pour n’auoir plus de seureté, Sçachans bien qu’homme d’Italie Iamais vne offence n’oublie. Qu’au contraire ils estoient tous prests D’abandonner leurs interests S’il luy plaisoit faire voyage, Sinon, que pour vn tesmoignage Qu’ils seroient toûjours seruiteurs De nos Illustres Senateurs, Ils s’en rapportoient à ces Iuges, Protestans que dans nos grabuges Ils auoient armé seulement Pour le public soulagement.
[1 mot ill.] Mars.
Ce iour Ordonnance Royalle Dessus la plainte generalle Qu’auoient faite nos Escheuins, Qui n’estoient pas des Quinze-vingts, Voulut qu’on nous donnast des viures, Pain & vin, dequoy nous rendre yures, Et boire en diable à la santé De sa Chrestienne Majesté, De toutes parts, par eau, par terre, Librement comme auant la guerre Le commerce estant restably, Et le reste mis en oubly : Bonne nouuelle pour la pance.
Lundy vingt & deux, en l’absence Du vaillant Prince de Conty Que la fiévre auoit inuesty, Le Coadjuteur en sa place Vint au Parlement, de sa grace, Dire que le iour precedent L’Archiduc homme fort prudent, Escriuit au Prince malade Qu’ayant fait vne caualcade, Et dit au Mareschal Praslain, Ie suis sur ta terre vilain, Pour oster toute deffiance Qu’il voulut enuahir la France, Il estoit prest de retourner, Si la Reine pour terminer Les differents des deux Couronnes Vouloit nommer quelques personnes. Et dit nostre frondant Pasteur Que Conty prenant fort à cœur L’occasion aduantageuse De conclure vne paix heureuse, Auoit à Ruël deputé Pour derechef estre insisté Sur ce que l’Archiduc propose, Qui meritoit bien vne pose :
| |||||