Saint-Julien,? [?] [1650], LE COVRRIER BVRLESQVE DE LA GVERRE DE PARIS, Enuoyé à Monseigneur le Prince de Condé, pour diuertir son Altesse durant sa prison. Ensemble tout ce qui se passa jusques au retour de Leurs Majestez. , françaisRéférence RIM : M0_814. Cote locale : A_9_9.
Le sept. Par vous braue Condé, Le Duc d’Orleans secondé, Ayant tiré des voisinages, Des villes, bourgs, chasteaux, villages, Autant de Troupes qu’il en put, Sans que Paris debloqué fut ; Il fit bien de caualerie Trois mille, & cinq d’infanterie, Qui fileront toute la nuit Vers Charenton à petit bruit.
7. Fevr.
Lundy huit. L’Aurore éueillée Vous trouua dans vne vallée, Que nous appellons tous Fescamp, Où le volleur est tres-frequent Durant tous les mois de l’année : Mais où deuant cette iournée Iamais tant il ne s’en compta Que dans ce iour elle emporta. Là vostre Gros prit sa seance, Et se saisit de l’eminence, Tandis que quelque Regiment Détaché par commandement, Alla pour donner l’escalade A la malheureuse bourgade, Auant qu’aucun fut assommé Clanleu par vos gens fut sommé De leur remettre cette place, Qui ne leur fit pas cette grace : Et sur l’heure les assiegeans De cette brauade enrageans Occuperent les auenuës Que nos canons rendirent nuës. Sans mentir le coup le premier Les fist plus nettes qu’vn denier ; Le second rompit quatre cuisses, Le troisiéme tua deux Suisses. Nauarre braue Regiment Lâcha le pied vilainement : Vingt de ses Officiers à terre Maudirent mille fois la guerre Qui les enuoyoit chez Pluton Deuant vn chetif Charenton. Vostre Altesse ayant sceu l’escarre Qui s’estoit fait de Nauarre, Pensa creuer dans son pourpoint Pourtant elle ne creua point, Sur l’esperance de combattre Le badaut qu’on tenoit à quatre, Qui comme vn Diable iuroit Dieu Qu’il vouloit secourir ce lieu. Il disoit d’elle peste & rage Cependant qu’auec aduantage Elle attendoit ceux de Paris Comme le chat fait la soutis : Se fiant sur son eminence Elle auoit grande impatience De taster le poux au Bourgeois Qui ne sortit point cette fois. Il est prudent & crait la touche, Ioint qu’il n’aime point la cartouche, Et qu’elle en auoit fait charger : Paris n’en vouloit point ronger, Et certes auecques prudence, (Puis qu’on dit que cette eminence Se pouuoit aussi peu forcer Que l’autre se pouuoit chasser.) Vostre Altesse faisant fanfare, Commit pour soustenir Nauarre Chastillon auec du renfort, Ou plûtost pour chercher la mort : Car, helas ! au bas de son ventre Vne balle de mousquet entre, Sans respecter ce Duc nouueau, Ieune, vaillant, adroit & beau. Tost apres vos troupes filerent Par des jardins qu’elles forcerent.
|