Car il alla trouuer la Reine,
Qu’il enchaina dans sa cadesne ;
Il luy broüilla tout son esprit,
En luy ostant son appetit ;
Ie le vis, le Diable m’emporte,
Regarder vne ronde porte ;
Afin de sortir promptement
Pour nous causer tant de tourment.
Il quitta la Reine, & alla
Se reposer cette nuict, là,
Son repos fut insuportable
A toute la terre habitable ;
Car il songea ; Et l’on le croy,
Qu’il deuoit de France estre Roy :
Ce Maquignon, ce detestable,
Cét Estranger abominable,
Donna l’allarme dans Paris,
Plus forte qu’on ne fit jadis.
Chacun ce regardoit pourtant
On en voyoit vn mal-contant,
L’autre disoit : Cét Eminence
Doit-il sortir hors de la France.
L’vn disoit, Il en sortira,
L’autre, Paris s’en sentira,
Puis qu’il est rebelle à la Reine,
Paris, ô bonté souueraine !
Ne demande que le repos,
En exillant plusieurs impots.
Et toy, qu’as-tu entendu dire ?