y auoient exercee autrefois, & pour laquelle
ils en auoient esté chassee. Elle fauorisa les partis
mieux nommez maletotes, & Marie de Medicis
nous amena le Marquis d’Ancre, dont le nom est assez
noir, & l’insolence trop recente, & la fin trop
tragique pour en dire d’auantage.

Le Cardinal de Richelieu, l’vn de ses Ministres &
de ses Disciples, a esleué le Card. M. qui a receu son
Ame & son genie à son dernier souspir, à la mode
des Anciens qui expiroient dans la bouche de leurs
proches. Ce poison & cét air infecté est comme
rentré dans le centre de l’Italie, d’où il estoit party :
ce bouc emissaire chargé de toutes les maledictions
de l’Europe, heritier de l’esprit, des imprecations, &
du funeste employ de ce tyran, a continué ses violences
auec les mesmes Ministres du defunct : apres
que la Reine pour nostre malheur l’eut choisi pour
nous gouuerner sous l’authorité de sa Regence, &
que l’on l’eut permis par vne lasche condescendãce
au lieu de le renuoyer aussi viste qu’il estoit venu,
pour le mal heur de l’Estat, Il arriua en France comme
postillon, il falloit qu’il retournast en poste ; mais
ie ne sçay où, car il est criminel à Rome, il est traistre
à la Sicile sa patrie, & au Roy d’Espagne son Maistre
& son Prince naturel ; il le faloit exiler dans vne isle
deserte, comme vn autre Philochtete.

Nos sages fols, ce sont nos politiques humains, &
non Crétiens, ont creu qu’il n’estoit pas mal à propos