P. M. D. C. [signé] / Camaldoli, Michel de (père) [1652], LE COMETE ROYAL PRONOSTIQVANT A LA Reine vn deluge des vengeances du Ciel, en punition, I. Des Incestes. II. Des Violements. III. Des Sacrileges. IV. Des Sodomies. V. Des Brutalités. Qui se cometent dans la guerre qu’elle fomente, pour soustenir l’Ennemy de la Chrestienté. , français, latinRéférence RIM : M1_66. Cote locale : B_4_2.
page précédent(e)

page suivant(e)

-- 7 --

aucune charge que de sa conduite, & d’autre
deuoir que l’exemple ; parce que les Reines ne regnent
point en France, que par le malheur de
l’enfance d’vn Roy leur fils, quand on les estime
capables de gouuerner l’Estat.

 

Ie croyois que Dieu nous vouloit deliurer des
calamitez qu’il répand ordinairement sur les sujets
d’vn Roy enfant ; tout le monde estoit dans
ce sentiment ; mais le mal vient asseurément de
nostre confiance. L’on ny a point apporté les ordres
necessaires, & quand sa Majesté receut cette
charge du ministere, ce deuoit estre auec des
conditions de Iustice, qu’elle ne pouuoit refuser.
Il falloit punir les crimes de l’autre regne, & purger
la Cour & le Conseil de ces monstres d’ambition
& d’auarice, qui ne respiroient que le feu
& le sang ; puis qu’ils auoient violé la sainteté de
la dignité Royale par des entreprises plus que tyranniques,
l’on deuoit preuoir qu’ils passeroient
au de là du pouuoir de la Regence, & que ce seroit
assez d’vn faux tiltre pour continuer leur exactions,
& leurs cruautez sur les Sujets du Roy.

Les exemples passez nous auoiẽt appris qu’encor
qu’vne Regence ne puisse rien introduire de
nouueau, ny abroger les Loix anciennes & fondamentales
de la Monarchie, qu’elle doit suiure,
elle ne laissoit pas neãtmoins de produire & d’esleuer
certaines gens comme des épines autour du



page précédent(e)

page suivant(e)