On ne s’est pas contenté d’auoir de la deffiance
de sa personne, on à voulu affoiblir ses forces
craignant que la vigueur de sa jeunesse ne leur fust
fatale, & ils ont voulu Eclypser ce bel Astre au milieu
de sa carriere, opposant des ombres à sa lumiere
iusques à ce qu’ils l’ont creu prés de son occident.

Mais la vertu de cét Heros à tousiours demeuré
Victorieuse & toutes leurs persecutions n’ont seruy
que de matiere à sa gloire, & donné vn iuste subiect
de condamner leurs cruautez & leurs iniustices. Ie
pourrois en suitte me plaindre des celles que
Mon Oncle le Duc d’Orleans à souffert lespace de
17. années continuelles par les artifices du plus crüel
& plus vindicatif Ministre qui ait paru iusqu’au Cardinal
Mazarin.

Certainement quand ie n’aurois d’autre motif
pour aller combattre cét Ennemy de tous les bons
François que pour suiure les ordres de son Altesse
Royalle, qui veut comme vn autre Persée deliurer
Andromede du Monstre Marin, c’est adire
briser les chaisnes de la pauure France, laquelle est
despuis si long-temps attachée à de rochers à des
impitoyables Ministres d’estre exposée à la rage
d’vne infinité de Monstres de Partisans, nourris de
sang & de carnage, il seroit assés puissant pour me
porter à seconder ce Heros, en vn si belle & si loüable
entreprise. Autres-fois quand quelque Pays
estoit incommodé de quelque monstre on voyoit