l’estenduë de leur passion ; Ils ne les portent enfin
à quelque dangereuse extremité qui n’aura plus de
resource.

Les Roys sont tout puissans, il est vray, ils sont
absolus, ils sont independans, ils sont Souuerains :
Mais comme leur independance n’est qu’vn pur
effet de la soumission des peuples, il est a propos
qu’on leur apprenne de bonne heure à n’estre pas
trop souuerains & trop independans dans leur
opinions particulieres, & à croire que la passion
leur peut bien souuent faire auancer, ce que la raison
leur fera retracter puis apres s’ils ne veulent
regner en Tyrans.

Les Roys, quelques Souuerains qu’ils soient ne
sont pas moins subjects à leurs passions que les
moindres de leurs subjects : Ils peuuent s’aheurter
à leurs caprices par opiniastreté, plustost que par
vn principe de raison : Mais s’ils veulent regner en
Roys, il faut necessairement qu’ils renoncent à ces
attachemens d’opiniastreté, lors qu’ils sont generallement
choquez par la voix publique ; Et qu’ils
digerent politiquement le desplaisir de n’auoir
peu executer ce qui deuoit estre contrequarré par
toutes les oppositions, ou par toutes les inclinations
de leur Estat. Les Roys peuuent beaucoup,
mais les peuples peuuent encor d’auantage, puis
qu’ils peuuent destruire les Roys : La complaisance