ne le met point à l’espreuue de vos artifices ;
& qu’il faut necessairement qu’il s’abandonne
à vostre conduite si ceux qui peuuent luy en faire
descouurir les fausses lumieres, sõt obligez de s’esloigner
d’aupres de sa presence pour se mettre à
couuert de vostre violence & de vostre tyrannie :
Ne nous parlez donc point de nous rendre le Roy,
si vous nous parlez d’esloigner ses Princes : Nous
souhaitons bien le Roy : Mais le Roy sans ses Princes
nous paroit redoutable : Nous l’aymons auec
eux, nous le craignons sans eux.

II. Il est vray que cette restriction que vous apportez
pour nous faire iouyr de la presẽce du Roy,
nous fait defier du bien mesme que nous souhaittons,
Mais quand bien il oubliroit apparemment
tout ce qui s’est passé ; Nous n’auons pas subiect
d’esperer qu’il puisse regner en Pere, puis que vous
esleuez son enfance Royalle à ne relascher iamais
de pas vne de ses pretentions quelques capricieuses
qu’elles soient ; Et que vous l’accoustumez à
vouloir absolument tout ce qu’il entreprendra,
sans luy faire entendre, qu’il est bien souuent de
la plus belle politique de flechir plustost que de
rompre ; Et que les Souuerains mesmes les plus independans
sont obligez quelquefois de se rendre
vn peu complaisans à la violence des affaires ; de
peur qu’en se roidissant pour les vouloir dãs toute