par [illisible]rallelle de ce sentiment.

Il ne faut point douter que la Maiesté est au sujet ;
ce que la pureté est a l’homme chaste, & que i’ay beaucoup
plus de raison d’asseurer qu’on n’offence iamais
legerement les Roys, du moins lors qu’on les offence
auec reflection ; Ie sçay bien que le braue Ariston courtisan
de l’Empereur Basile offensa son maistre au trauers
du sanglier qu’il auoit percé d’vn coup de fleche
pour le garantir promptement : Mais ce coup ne partoit
pas d’vn principe de reflection ; & l’Empereur qui
le receut ne s’en tint point offencé, parce qu’il ne l’auoit
receu que de la passion innocente de son courtisan,
qui l’auoit voulu sauuer lors mesme qu’aparemment
il auoit risqué sa perte.

Il n’en est pas de mesme des offences, quelque
peu considerables qu’elles semblent, qui se font auec
vne entiere reflection, contre vn souuerain ou contre
vn de ses Princes du Sang : parce que dans ces matieres
là, le degré de l’enormité du crime ne se prend pas de
ce qu’on a fait mais de ce qu’on a cru faire ; & c’est cette
reflection d’vne mal ce premeditée, qui ne permet
point qu’on trouue iamais aucune legereté, dans les
mauuaises actions qui se font par ce mauuais principe,
contre les Roys ou contre leurs Princes du Sang : on
peut bien parler : mais ie pense qu’on ne peut point
repartir à ce raisonnement, auec aucune sorte de probabilité.