pouuoir rien entreprendre ou destourner qui soit important
à l’Estat, que par la deliberation Souueraine de
ce Parlement des Pairs, dans lequel il a son lit de Iustice,
represente autrefois dans l’assemblée generalle des François,
par cét auguste Tribunal, que nos Ancestres esleuoient
dans le Champ de Mars, pour y faire asseoir nos
anciens Roys ses predecesseurs.

Ie voudrois bien demander à quelque honeste homme,
si toutefois il s’en trouue quelqu’vn dans le Party
M. quel estoit autrefois le pouuoir de cette Assemblée
des Francs representée auiourd’huy par le Parlement des
Pairs ; ou du moins, qu’elle estoit l’authorité des Roys,
lors qu’assis sur ces Tribunaux esleuez dans les Champs
de Mars, ils y presidoient auec tant de Maiesté : Ces derniers
estoient-ils bien si puissans, que les Assemblées ne
peussent resoudre, que ce qui seroit au gré de leur passiõ ;
Où ces assemblées auoient-elles quelque pouuoir de resoudre
absolument sur les affaires publiques. sans que
les Souuerains s’y peussent opposer par les seuls obstacles
de leur authorité : Ie ne veux rien decider, Mazarin
qui que tu sois, rapportons-nous en tous deux à l’histoire,
& nous scaurons que dans la premiere race, cette assemblee
des Francs qui se faisoient à toute sorte de rencontres,
decidoit souuerainement, le Roy present où
non present, toutes les affaires d’Estat ; Et que dans la
seconde race & dans le commencent de la troisiesme,
comme ces assemblées ne se faisoient qu’vne fois l’année
on y resoluoit les affaires importantes lors que le Roy
n’y estoit pas, auec la mesme souueraineté que s’il y eust
esté present.