TRES-HVMBLES REMONSTRANCES
par escrit faites & presentees au
Roy par Messieurs du Parlement de Paris
en la Ville de Sully sur Loire.
Contre le retour & pour l’esloignement
ou la punition du Cardinal
Mazarin.
SIRE,
La Declaration de Vostre Majesté, qui bannissoit pour iamais de
son Royaume & païs de son obeïssance le Cardinal Mazarin, ayant
precede d’vn iour la seance que Vostre Majesté prit en son Lict de
Iustice pour sa Majorité, ne nous pouuoit pas permettre de douter
de la fermeté d’vn acte si solemnel, que Vostre Majesté faisoit volontairement
auec tous ses Sujets à la veuë de toute la France.
Nous, qui estions depositaires de la foy publique, eussions creu
cõmettre vn crime de nous en deffier, lors que nous apprismes bien-tost
apres que le Cardinal Mazarin employoit tous les artifices qui
luy sont ordinaires, & faisoit de puissantes cabales dans vostre
Cour pour y reuenir, & se restablir dans l’authorité qu’il auoit vsurpée
durant vostre Minorité. Le dessein de cet homme ambitieux luy
a si bien reüssi que joignant la force à la surprise il s’est approché de
vostre personne, & a repris la conduitte de vostre Royaume, contre
les protestations qu’il a faites dans ses Lettres de ne se mesler iamais
d’aucune affaire d’Estat.