Boyer, Paul / sieur du Petit Puy [?] (P. B. E. [signé]) [1649], L’IMAGE DV SOVVERAIN OV L’ILLVSTRE PORTRAICT DES DIVINITEZ MORTELLES : OV IL EST TRAITÉ Contre l’opinion des Libertins du Siecle. Dedié à sa Majesté par P. B. E. Rex verò lætabitur in Dec, laudabuntur omnes qui iurant in eo; quia obstructum est os loquentium iniqua. , françaisRéférence RIM : M0_1684. Cote locale : C_5_58.
page précédent(e)

page suivant(e)

-- 8 --

Promoteur pour disposer équitablement d’vn nombre infiny
de ses creatures, n’est pas vne petite marque de la grandeur
des Roys, ny de l’estime que cet illustre Legislateur
fait de leur personne. Cet admirable principe de nostre salut
fait bien voir dans sainct Mathieu, en quelle consideration
il a cette grandeur Royale ; puis qu’il paye aux Roys luy
mesme le tribut qu’il ne leur doit pas, de crainte de les offenser,
& de crainte de laisser vn mauuais exemple à ceux
qui doiuent viure sous la domination des Princes. Et par la
mesme bouche du mesme Oracle, ne dit-il pas qu’il faut rendre
à Cesar ce qui est à Cesar, sur peine de tomber en sa disgrace ?
Que ne fait-il pas encore pour donner plus de lustre
& plus de pouuoir à cette dignité si excellente ? Il veut que
tous ceux qui le possedent fassent tout ce qu’il leur plaira, des
creatures qui viuent sous vne authorité si extraordinaire.
Ce n’est pas pour cela que la Souueraineté du Prince puisse
aller du pair auec celle de Dieu, ny qu’elle puisse iamais estre
si absoluë, attendu que celle de ce diuin Seigneur ne dépend
que de sa propre volonté, celle de la creature releue de sa
toute puissance. Ce n’est pas aussi que sa diuine bonté ne
veuille absolument que ces Maistres de l’Vniuers, ne trauaillent
beaucoup plus à l’édification de leurs sujets, qu’à
la ruine de leurs peuples. Les Roys perseuerant dans leur
malice periront aussi bien que le moindre des mortels, si
Dieu ne retracte pas des Arrests qui luy doiuent estre inuiolables.
Enfin ie ne sçache pas vne dignité quelle que ce
puisse estre, horsmis celle du Sacerdoce, qui ne soit comprise
de la Monarchique. Aussi doit elle tenir le premier rang
entre celle de Dieu & celle des hommes, comme estant la
plus digne & la plus illustre de toutes les autres. Dieu est le
Maistre des Souuerains, & les Souuerains sont les maistres
des peuples. Dieu est le Seigneur absolu de tout l’estre creé,
& les Roys sont les Seigneurs absolus de tout ce qui respire
l’air dans l’estenduë de leur Empire. Dieu est vn Monarque
independant, & les Roys sont des Monarques qui ne releuent
que de cette authorité independante. En vn mot la dignité
Royale est vne grace de Dieu si éminẽte & si glorieuse,
qu’à peine peut-elle estre comprise des hommes. Grace aux


page précédent(e)

page suivant(e)