Anonyme [1649], SVITTE ET QVATRIEME ARRIVÉE DV COVRIER FRANÇOIS, APPORTANT TOVTES LES Nouuelles de ce qui s’est passé depuis sa troisiéme arriuée iusques à present. , françaisRéférence RIM : M0_830. Cote locale : C_1_40_04.
page précédent(e)

page suivant(e)

-- 5 --

declaré les Registremens des Edicts & Declarations, portans creation
dudit Semestre, & ce qui s’en est ensuiuy nul & de nul effect, comme faits
contre & au preiudice des anciennes Ordonnances & Loix du Royaume,
&c.

 

Le second du trentiéme, qu’il sera informé des violences faites par les
Gens de Guerre en ladite Prouince, & defenses à toutes personnes de faire
aucunes leuées ny logemens de Guerre, sans ordre & attache dudit
Sieur Duc de Longueuille.

Et le troisiéme, que les deniers des Tailles & autres, seroient conduits
& voicturiez aux Bureaux Generaux de leurs Receptes, où ils demeureront
iusques à ce qu’autrement en ait esté ordonné, &c.

L’interest que l’on auoit de faire sçauoir aux Prouinces l’estat des assaires
de cette Ville, & le peu d’asseurance & de fidelité que l’on auoit
esprouué aux Couriers & autres personnes publiques, a obligé Messieurs
de la Cour de Parlement de commettre six Conseillers d’icelle, afin de remedier
à cét inconuenient, escrire ausdites Prouinces, & en receuoir
responses.

L’Archeuesque de Thoulouse est arriué icy de sainct Germain, où il
estoit allé de son propre mouuement, pour tesmoigner à la Reyne Regente
la bonne intention de Messieurs du Parlement & du peuple de Paris
au seruice de leurs Majestez.

Ce mesme iour cinquiéme, Monsieur le Duc de Beaufort, & Monsieur
le Mareschal de la Motte-Houdancourt, estans sortis de Paris auec quelque
Caualerie, pour nettoyer le chemin de Meaux des voleurs qui sortent
de la Garnison de sainct Denys, rencontrerent proche les Bois de
Bondy plusieurs Troupes de Caualerie, la pluspart Allemands ; lesquels
estans attaquez, celuy qui les conduisoit ayant voulu choquer mondit
Sieur Duc de Beaufort, il fut porté par terre d’vn coup de pistolet que
ledit Sieur Duc luy tira, dont il mourut sur le champ : & en suitte
quantité d’autres desdits Allemands ; plusieurs faits prisonniers, & le
reste mis en déroute ; de sorte qu’ils ne trouuerent leur salut qu’en la
fuitte, qui fut si prompte qu’elle empescha nos Troupes de les suiure.

Les Regimens d’Infanterie de Conty, Cugnac, Villebois & autres, firent
reueuë en la Place Royalle en presence de Messieurs les Deputez de
Parlement & Cours Souueraines, & des Preuost des Marchands & Escheuins
de cette Ville.

Le Samedy sixiéme la Cour ordonna que description seroit faite des
Papiers, Tiltres, & Contracts qui appartenoient à la Duchesse d’Aiguillon,
& qui estoient dans deux coffres qui auoient esté arrestez, comme
on les faisoit transferer furtiuement pour en oster la connoissance, lesquels
papiers on dit estre de consequence, pour iustifier des immenses



page précédent(e)

page suivant(e)