Anonyme [1649], OBSERVATIONS CVRIEVSES, SVR L’ESTAT ET GOVVERNEMENT DE FRANCE. Auec les Noms, Dignitez & Familles principales, Comme il est en la presente année 1649. , françaisRéférence RIM : M0_2568. Cote locale : A_6_85.
page précédent(e)

page suivant(e)

-- 29 --

BAILLAGES.

CE sont Iustices Royalles, mais moindres que les Presidiaux :
elles ont vn Lieutenant General, Ciuil & Criminel, 5. ou six
Conseillers, Aduocat & Procureur du Roy.

Deuanceux releuent les appellations des Iuges Subbalternes &
Chastellenies ; c’est à dire des Seigneurs qui ont droict de Iustice,
dont le nombre est infiny.

LE BAN ET ARRIEREBAN.

Dans les publiques necessitez ; & quand les forces estrangeres
semblent menacer l’Estat, nos Roys ont le Ban, & Arriereban ;
c’est à dire la conuocation des Nobles, & de ceux qui possedent
terres & fiefs ; & c’est aux Baillifs & Gouuerneurs des Prouinces,
de donner ordre qu’ils se rendent au lieu de l’assignation,
& des commandemens du Prince, comme nous auons veu en
l’année 1635. quand les Espagnols entrerent dans la Picardie, &
que nous fumes contraincts de considerer sainct Denys en France,
comme vne Frontiere de Paris.

GOVVERNEVRS DES PROVINCES.

Les principaux Gouuernemens de ce Royaume sont,
Le Gouuernement de Paris & de l’Isle de France, & est à
monsieur de Montbazon.

Celuy de Guyenne, à monsieur le Duc d’Espernon.

Celuy de Bourgogne, à monsieur le Prince de Condé.

Celuy de Languedoc, à Monseigneur le Duc d’Orleans.

Celuy de Dauphiné, à monsieur le Duc de Lesdiguieres.

Celuy de Champagne, & de Brie, à monsieur le Prince de
Condé.

Celuy de Picardie, à monsieur le Duc d’Elbeuf.

Celuy de Normandie, à monsieur le Duc de Longueuille.

Celuy de Bretagne, à la Reyne Regente.

Celuy de Bearn, au Mareschal de Grammond.

Celuy de Prouence, à monsieur le Comte d’Alez.



page précédent(e)

page suivant(e)