que nos ombres tenebreuses n’approchent iamais du
throsne que l’on vous prepare. Iamais homme du monde
n’a mieux merité de si dignes accueils, ny iamais ambitieux
n’y fut mieux receu, qu’on espere d’y receuoir
vostre Eminence. Vos y trouuerez vn nombre infiny
de personnes qui vous entretiendront des affaires
d’Estat, & des prosperitez malheureuses. Vous y verrez
des Princes turbulens & des Reynes passionnées.
Vous y rencontrerez des Tyrans, des Perturbateurs du
repos public, & des Sangsues vniuerselles. En vn mot,
vous y trouuerez des Amoureux languissans, des Garces,
& des Filoux, capables de vous diuertir & d’entretenir
vos pensées. Les François sont des Peuples aussi
ingrats, que la Nature en sçache produire. Gregoire
de Tours dit que leur origine vient des Hongres ; Diodore,
Vigilence les font sortir de Franconie, contrée
d’Alemagne Amian, Marcellin, & Tacite, veulent
qu’ils soient naturellement François : Mais quoy qu’il
en soit, & les vns & les autres nous asseurent qu’ils sont
médisans, glorieux, de grand esprit, inconstans &
fort propres aux armes. Tite-Liue. Diodore, Plutarque
& Iules Cesar les preferent en valeur à toutes les
autres Nations de la terre. Si cela est, n’esperez pas d’en
receuoir vn traittement plus fauorable que ceux qui les
ont obligez en tout ce qui leur a esté possible. Que
n’ay-je pas fait pour ce Peuple Ingrat & Barbare, lors
que ie gouuernois les affaires de leur Monarchie, sous
la Regence d’vne tres-Auguste Princesse comme la vostre ?
Vous pouuez auoir sceu de l’Histoire les seruices
que ie leur ay rendus, & de quelle sorte ils ont recompensez

page précédent(e)

page suivant(e)