viuans sur la terre, & pres de vous à leur ayse,
par la permission de Dieu, pour vostre punition &
la nostre, & pour la vengeance des iniustices qui se
commettent. Ils vous ont ja embourbé au profond
des fautes & desordres que nous voyons, & continueront
à l’aduenir de plus en plus, si Dieu n’a pitié
de nous, & ne vous reueillez de l’endormissement,
duquel ils vous tiennent ensorcelé.

Et de fait voyez, ie vous prie, comment ils vous
ont apris à couurir mille iniustes leuées qui se font
sur le peuple d’vne necessité de vos affaires : C’est le
langage qu’ils vous font tenir à toutes personnes qui
vous en font remonstrances, lesquelles vous escoutez
en vain, quelques iustes qu’elles soient, & vous
n’auez autre chose à dire, pour la defence & couuerture,
de tant d’iniquité, sinon qu’il vous plaist
ainsi estre faict, & que c’est pour subuenir à la necessité
de vos affaires, affaires, ausquelles ne pouuez
autrement pouruoir, à la raison du peu de moyen &
reuenu que vous auez d’ailleurs.

Et sur cela, SIRE, personne ne vous peut honnestement
& seurement desdire : L’on craindroit en
ce faisant de vous offencer : mais s’il faut en parler
à la verité, l’on sçait assez que vous n’estes en telle
necessité que vous pensez, & vos mauuais conseillers
le vous font accroire, pour leur profit particulier.

Mais y a-t’il homme si hebeté, qui croye qu’vn
Roy soit pauure & necessiteux, qui a quantité de
millions à despendre comme vous auez par année,
& dont recepte se fait à vostre profit : Cela ne se
peut nier : car il se iustifie en vostre chambre des
Comptes. En quel temps est ce que les Roys de
France ont iamais fait telle recepte approchante du
reuenu des plus grands Monarques de la terre, &
suffisante pour armer contre les plus puissans ennemis