visiter par deux Commissaires, sur le rapport
desquels apres s’estre remply de bonne chaire,
& de l’armonie de toutes les bandes des violons
qui sont en grand nombre dans Rouën,
sortant de sa salle, qui sembloit vne salle à faire
nopces. Il passa dans son cabinet suiuy de feu
Picot Lieutenant des Gardes en la Preuosté de
l’Hostel, estant ordinairement à sa suitte, auquel
il bailla vne liste de huit on dix de ces prisonniers,
auec cõmandement verbal d’en aller
ce mesme iour faire roüer les vns & pendre les
autres, ce qui fut executé sans autre formalité
ny ordre de Iustice. Le lendemain il fit encore
faire pareille execution d’vn autre semblable
ou plus grand nombre de ces miserables, qui
n’auoient esté non plus que les premiers par lui
veus ny oüis.

Toute la France a porté vne espece de deüil
de la mort de feu Monsieur de Thou, qui fut
iugé à Lyon auec Monsieur de Cinq-Mars
grand Escuyer de France au mois de Septẽbre
de l’année mil six cens quarante-deux : Mais
peu de personnes sçauent que le Cardinal de
Richelieu auoit grand dessein de le sauuer en
procurant sa grace aupres du Roy, & de laisser
tomber l’effet de la condamnation sur Monsieur
de Cinq-Mars, comme le chef & principal
autheur de la conjuration qui s’estoit lors