en luy, disposées pour en faire vn bon sujet.

Tout le monde sçait qu’il ne s’est conserué
en cette Charge, & en celle de Chancellier, qui
luy fut quelque temps apres baillée, comme
par droit de bien-sceance dans le temps de la
detention de Monsieur de Chasteau-neuf &
à son preiudice, que par vne absoluë dependance
& obeyssance aueugle à tous les ordres
de ce Cardinal, & par son alliance, qu’il achepta
tres-cherement en mariant sa fille
aisnée auec vn pauure Gentil-homme de Bretagne
son parent. Ie ne vous diray rien de ses
rapines durant ce regne passé, le decry en a
esté si grand, qu’il y a peu de pérsonnes qui
n’en soient suffisamment informez.

Mais ie ne puis passer sous silence, I’inoüye
& plus que barbare execution qu’il fit faire au
commencement de l’année six cens quarante
dans la Ville de Rouën, où il auoit esté enuoyé
pour restablir par la Iustice l’authorité du
Roy dans la Prouince de Normandie, que le
feu Mareschal de Gassion auoit nouuellement
subjugée par les armes. Il y auoit quelque
nombre de miserables personnes dans la Conciergerie
du Palais, qui auoient esté pris de
l’authorité du Parlement, comme estans participans
de la sedition esmeuë en cette ville-là,
Cét illustre chef de la Iustice les enuoia vn iour