Anonyme [1652], L’ESPRIT DV FEV ROY LOVIS XIII. A SON FILS LOVIS XIV. Luy monstrant que la mauuaise conduite de Mazarin, est la cause des troubles de l’Estat. Et luy donnant les moyens infaillibles de les appaiser, par son retour en sa bonne Ville de Paris. , françaisRéférence RIM : M0_1287. Cote locale : B_3_3.
page précédent(e)

page suivant(e)

-- 23 --

la France, a fait transporter plusieurs millions
en Italie, qu’il a reuestuë ainsi des despoüilles de
nostre Royaume sans vostre aueu, ny celuy d’aucun
des Trois Estats ; si ce n’est du Clergé, qui
preste vne obeyssance aueugle à tous ses desseins.

 

Le Cardinal de Richelieu sortit d’vne maison
assez illustre, fut nourri dans le sein des Muses, &;
parmy les exemples d’honneur & de sainteté, fit
tousiours voir dans son visage, ie ne sçay quoy
d’Auguste, d’imperieux & de grand, n’eut point
d’habitudes, qui ne sentissent le Heros & le grand
Homme d’Estat, ny de passions que celles qui
tendent aux grandes choses : & le Mazarin tiré
de la fange, esleué parmy des Valets & des Estafiers,
en la plus sale Goinferie, & parmy des exemples
d’infamie & de saleté, n’a point desmenti
cette origine abjecte, & cette education reprochable,
n’a dans le visage rien qui ne sente le
Bastelleur, & le Bourgeois de Mazare, aucune
habitude que vitieuse, & nulle passion que basse
& rampante, s’il ne la tient par emprunt de la
fortune.

Le Cardinal de Richelieu, fut zelé pour la
grande reputation, & restablit celle du nom
François dans l’Afrique & dans l’Asie, aussi bien
que dans l’Europe, & Mazarin a paru tousiours
tellement indifferent à l’infamie, qu’on ne doit
point s’estonner, s’il tient indifferent le preiudice



page précédent(e)

page suivant(e)