dire & comprendre en peu de mots, il faut qu’il
soit comme vne victime consacrée au bien de
l’Estat ; qu’il n’ait de vœus de tendresses & de passions
que pour luy seul ; &;qu’il ait fait vne protestation
inuiolable de mourir plustost que de se
departir de ses interests, suiuant ce que le Maistre
des Roys dit en quelque endroit, en parlant du
bon Ministre ou Pasteur, Bonus pastor animam dat
pro ouibus suis. Cette condition est aussi necessaire
pour le faire iuger tel qu’il entre par la porte,
& non par la bréche, de peur d’estre reputé
larron & voleur. C’est pour dire que comme
Azala, ce fameux Gennois, fauory du grand Tamerlans,
qu’il seruit fidellement iusques à la
mort, auec vne approbation singuliere de tous
ses peuples, il se doit faire aimer égallement, &;
desirer de tout le monde, ne procurer que leur
aduantage en general, & leur bien en particulier;
establir tous ses biens, tous ses thresors, & toute
sa gloire dans cet amour du Prince & de ses peuples,
& se contenter du tesmoignage que sa conscience
luy rend de l’heureuse application de son
esprit, sans se monstrer trop zelé, comme le feu
Cardinal de Richelieu, pour la grande reputation,
qui ne peut iamais manquer aux bonnes
actions aprés la mort.

Iugez maintenant de grace autant que vous
estes capable d’vser de discernement & de reflection,
si vostre Mazarin, pour estre digne d’estre